Obverse
Column 2
1. Namma parā INA URUIshupitta pāun. Nu URUPalhuissan
2. walhun. Nu=mu=san INA URUPalhuissa appan LÚKÚR URUPeshurus
3. zahhiya tiyat. N(u)=an zahhiyanun, nu=mu dUTU URUArinna GAŠAN=YA,
4. Tarhus NIR.GÁL BĒLI=YA, Mezzullas DINGIR.MEŠ=ya hūmantes piran huēr.
5. Nu=kan LÚKÚR Pishurun INA URUPalhuissa appan kuenun.
6. Namma URU-an arha warnunun.
──────────────────
7. Namma URUPalhuissaz appa INA URUHatti uwanun.
8. Nu=za ERIN2.MEŠ ANŠU.KUR.RA.MEŠ nininkun. Namma apēdani MU-ti INA KUR Arzawa
9. iyanniyanun=pat ANA mUhha-LÚ=ma LÚṬĒMA uiyanun.
10. Nu=si hatranun : "ÌR.MEŠ=YA=wa=ta=kan kuēs anda uer
11. nu=war=as=ta appa kuit wewakkinun nu=war=as=mu appa
12. appa UL pāista. Nu=wa=mu=za TUR-lan halzessesta,
13. nu=wa=mu=za tepnuskit. Kinun=a=wa ehu. Nu=wa zahhiyawastati.
14. Nu=wa=an=as Tarhus BĒLI=YA DĪNAM hannāu."
──────────────────
15. Mahhan=ma iyahhat nu mahhan INA ḪUR.SAGLawasa arhun,
16. nu=za Tarhus NIR.GÁL EN=YA parā handandatar tekkussanut :
17. nu kalmisanan siyāit. Nu kalmisanan ammēl KARAŠ.ḪI.A=YA
18. uskit, KUR URUArzawa=ya=an uskit, nu kalmisanas pāit,
19. nu KUR URUArzawa walhta. ŠA Uhha-LÚ=ya URUApasan URU-an walhta,
20. Uhha-LÚ-na genus=sus asesta, N(u)=as irmaliyattat.
21. Nu mahhan Uhha-LÚ-is irmaliyattat, n(u)=as=mu namma zahhiya
22. menahhanda UL uit, nu=mu=kan mSUM.MA-dKAL-an DUMU=ŠU
23. QADU ERIN2.MEŠ ANŠU.KUR.RA.MEŠ menahhanda parā naesta.
24. N(u)=as=mu INA ÍDAstarpa INA URUWalmā zahhiya tiyat.
25. N(u)=an dUTU-ŠI zahhiyanun. Nu=mu dUTU URUArinna GAŠAN=YA
26. Tarhus NIR.GÁL BĒLI=YA Mezzullas DINGIR.MEŠ=ya hūmantes piran huēr.
27. Nu=za mSUM.MA.dKAL-an DUMU Uhha-LÚ QADU ERIN2.MEŠ=ŠU ANŠU.KUR.RA.MEŠ=ŠU tarhun
28. n(u)=an=kan kuenun. Namman appan=pat AṢBAT. Nu=kan KUR URUArzawa
29. parranda pāun, nu INA URUApāsa ANA URU-LIM
30. ŠA Uhha-LÚ andan pāun. Nu=mu Uhha-LÚ-is UL mazzasta,
31. n(u)=as=mu=kan huwāis. N(u)=as=kan aruni parranda
32. gursawananza pāit. N(u)=as=kan apiya anda esta.
──────────────────
33. KUR URUArzawa=ma=kan hūman parsta. Nu kuēs NAM.RA INA ḪUR.SAGArinnanda
34. pāir, nu=za=kan ḪUR.SAGArinnandan eppir. Kuēs=ma NAM.RA.MEŠ
35. parā INA URUPuranda pāir, nu=za=kan URUPurandan eppir.
36. Kuēs=ma=kan NAM.RA.MEŠ aruni parranda ITTI Uhha-LÚ pāir.
37. Nu dUTU-ŠI INA ḪUR.SAGArinnanda ANA NAM.RA.MEŠ appanda pāun.
38. Nu ḪUR.SAGArinnandan zahhiyanun, nu=mu dUTU URUArinna GAŠAN=YA [...]
39. Tarhus NIR.GÁL BĒLI=YA Mezzullas DINGIR.MEŠ=ya hūmantes piran
40. huēr. Nu=za ḪUR.SAGArinnandan tarhun,
41. nu=za dUTU-ŠI kuin NAM.RA INA É LUGAL uwatenun.
42. N(u)=as 1×10000 5-LIM 5-ME NAM.RA esta. URUHattusas=ma=za EN.MEŠ ERIN2.MEŠ ANŠU.KUR.RA.MEŠ=ya
43. kuin NAM.RA.MEŠ uwatet, nu=san kappuwāwar
44. NU.GÁL esta. Namma=kan NAM.RA.MEŠ dUTU-ŠI parā
45. nehhun, n(u)=an arha uwater.
──────────────────
46. Nu=za mahhan ḪUR.SAGArinnandan tarhun,
47. namma appa INA ÍDAstarpa uwanun. Nu=za BÀD KARAŠ
48. INA ÍDAstarpa wahnunun, nu=za EZEN MU-ti apiya iyanun.
49. Nu kī INA MU.1.KAM iyanun.
──────────────────
50. Mahhan=ma hameshanza kisat. Nu Uhha-LÚ-is kuit irmaliyattat
51. n(u)=as=kan aruni anda esta, DUMU=ŠUNU=ya=si kattan esir.
52. Nu=kan Uhha-LÚ-is aruni anda BA.UG7, DUMU.MEŠ=ŠUNU=ma=za arha
53. sarrandat. Nu=kan 1-as ŠÀ A.AB.BA=pat esta, 1-as=ma=kan
54. Tapalazunawalis arunaz arha uit. Nu=kan KUR URUArzawa kuit hūman
55. [...] INA URUPuranda sarā pānza esta,
56. nu=za Tapalazunawalis INA URUPuranda sarā pāit.
──────────────────
57. Nu dUTU-ŠI ERIN2.MEŠ URUHatti karpun, nu INA URUPuranda zahhiya pāun.
58. Nu=kan Tapalazunawalis IŠTU ERIN2.MEŠ ANŠU.KUR.RA.MEŠ URUPuranda-za katta uit,
59. n(u)=as=mu zahhiya menahhanda uit, n(u)=as=mu=kan INA A.ŠÀ A.KÀR=ŠU
60. anda zahhiya tiyat. N(u)=an dUTU-ŠI zahhiyanunun.
61. Nu=mu dUTU URUArinna GAŠAN=YA Tarhus NIR.GÁL BĒLI=YA
62. Mezzullas DINGIR.MEŠ=ya hūmantes piran huēr. Nu=za Tapalazunawalin
63. [...] QADU ERIN2.MEŠ=ŠU ANŠU.KUR.RA.MEŠ=ŠU tarhun, n(u)=an=kan kuenun.
64. Namman appan AṢBAT. Nu pāun URUPurandan anda wahnunun.
65. N(u)=an=kan anda hatkesnunun, nu=si=kan widār arha dahhun.
──────────────────
66. Nu kuitman URUPurandan anda hatkesnunun,
67. nu=kan Tapalazunawalis kuis DUMU Uhha-LÚ INA URUPuranda sēr esta
68. nahsarriyattat. N(u)=as=kan URUPuranda=za ispandaz katta huwāis.
69. Nu=san DUMU.MEŠ ŠA NAM.RA.MEŠ=ya saramnaz piran huinut,
70. n(u)=an=kan URUPuranda=za katta pehutet.
──────────────────
71. Mahhan=ma dUTU-ŠI istamassun : "URUTapalazunawalis=wa=kan
72. MI-az katta huwāis, anda=wa=za DUMU.MEŠ=ŠU NAM.RA.MEŠ=ya
73. saramnaz piran huinut, nu=war=an=kan katta pehutet",
74. nu=si dUTU-ŠI ERIN2.MEŠ ANŠU.KUR.RA.MEŠ appanda uiyanun.
75. N(u)=at=si [Tapalazunawalin] KAS-si appanda tamassir,
76. nu=si=san DUMU.MEŠ=ŠU NAM.RA.MEŠ=ya arha dāir, n(u)=an appa
77. eppir. Tapalazunawalis=ma 1-as harsanas isparzasta.
78. [...] n(u)=an=za=an ERIN2.MEŠ=pat ANŠU.KUR.RA.MEŠ dās.
──────────────────
79. [...] URUPurandan anda hatkesnunun.
80. [...] zahhiyanun. Nu=mu DINGIR.MEŠ
81. nu=mu dUTU URUArinna GAŠAN=YA Tarhus NIR.GÁL EN=YA Mezzullas
82. DINGIR.MEŠ=ya hūmantes piran huēr. Nu=za URUPurandan tarhun,
83. nu=za kuin NAM.RA INA É LUGAL uwatenun n(u)=as 1×10000 6-LIM x-ME
84. NAM.RA esta. URUHattusas=ma=za EN.MEŠ ERIN2.MEŠ ANŠU.KUR.RA.MEŠ=ya kuin NAM.RA.MEŠ
85. uwatet nu=san kappuwāwar NU.GÁL esta.
86. Namma=kan NAM.RA.MEŠ URUHattusi parā nehhun, n(u)=an arha uwater.