2.BoTU.48 = VAT.6165 = KBo.III.4

Reverse

Column 3

6 lines broken.

1. [...-u]n nu [...]

2. [...-n]a-aš-k[án ...]

3. [... ku-i-e-eš] IT-TI LU[GAL KUR URUar-za-u-wa]

4. [a-ru-ni par-ra-an-da pa-a-an-te-eš e-šir na-aš] IŠ-TU GIŠGIGIR [Ù IŠ-TU NAM.RA-aš]

5. [X-10000 X-LI-IM X-ME NAM.RA e-eš]-ta na-an-kán [...]

6. [URUKUG.BABBAR-ši pa-ra-a ne-eḫ-ḫu-un na-an] ar-ḫa ú-wa-te-er [...]

7. [... IŠ-TU GIŠGIGIR] Ù IŠ-TU NAM.[RA.MEŠ ...]

8. [X-10000 X-LI-IM X-ME] NAM.RA e-eš-ta [...]

9. [na-an-kán URUKUG.BABBAR-ši pa-ra-a n]e-eḫ-ḫu-un na-an ar-ḫa ú-[wa-te-er ...]

10. [nam-ma a-ru-na-aš ar-ḫ]a EGIR-pa ú-wa-nu-un nu-kán I-NA ŠÀ [ÍDše-e-ḫa]

11. [ku-iš NAM.RA an-da e]-eš-ta ma-a-na-an za-aḫ-ḫi-ia-nu-un nu-mu-[...]

12. [mma-na-pa-dU-aš iš-ta]-ma-aš-ta LUGAL KUR ḫat-ti-wa ú-iz-zi [...]

13. [nu-kán na-aḫ-šar-ri]-ia-at-ta-at na-aš-mu nam-ma me-na-aḫ-ḫ[a-an-da]

14. [Ú-UL ú-it nu-m]u-kán AMA-ŠU LÚ.MEŠ.ŠU.GI ŠU.GI-ia

15. [me-na-aḫ-ḫa-an-da] pa-ra-a na-iš-ta na-at-mu ú-e-er GÌR.MEŠ-aš kat-ta-an

16. [ḫa-a-li-i-e-er] nu-mu MUNUS.MEŠ ku-it GÌR.MEŠ-aš GAM-an ḫa-a-li-i-e-er

17. [nu A-NA MUNUS.MEŠ] ḫa-a-an-da ka-a-ri ti-ia-nu-un nu nam-ma I-NA ÍDše-e-ḫa

18. [Ú-UL p]a-a-un nu-kán NAM.RA URUKUG.BABBAR-ši ku-iš I-NA ÍDše-e-ḫa

19. [an-d]a e-eš-ta na-an-mu pa-ra-a pí-i-e-er nu-mu NAM.RA ku-in

20. pa-ra-a pí-i-e-er na-aš 4-LI-IM NAM.RA e-eš-ta na-an-kán URUKUG.BABBAR-ši

21. pa-ra-a ne-eḫ-ḫu-un <<be>> na-an ar-ḫa ú-wa-te-er mma-na-pa-dU-an-ma-za

22. KUR ÍDše-e-ḫa-ia ÌR-an-ni da-aḫ-ḫu-un

Single rule.

23. nam-ma I-NA KUR URUmi-ra-a pa-a-un nu KUR URUmi-ra-a A-NA mmaš-ḫu-i-lu-wa AD-DIN

24. KUR ÍDše-e-ḫa-ma A-NA mma-na-pa-dU AD-DIN KUR URUḫa-pal-la-ma A-NA mtar-ga-aš-na-al-li

25. AD-DIN nu-za-kán ke-e KUR.KUR.MEŠ pé-e-di-iš-ši ÌR-na-aḫ-ḫu-un

26. nu-uš-ma-aš-kán ERIN2.MEŠ iš-ḫi-iḫ-ḫu-un nu-mu ERIN2.MEŠ pí-iš-ki-u-an da-a-ir

27. nu-kán I-NA ŠÀ KUR URUar-za-u-wa ku-it ŠE12-ia-nu-un I-NA MU.2.KAM-ma-mu

28. dUTU URUTÚL-na GAŠAN-IA dU NIR.GÁL EN-IA dme-ez-zu-ul-la-aš DINGIR.MEŠ-ia

29. ḫu-u-ma-an-te-eš pí-ra-an ḫu-u-i-e-er nu-za KUR URUar-za-u-wa tar-aḫ-ḫu-un

30. nu-za ku-it URUKUG.BABBAR-ši ar-ḫa ú-da-aḫ-ḫu-un ku-it-ma-za-kán pé-di-iš-ši

31. ÌR-na-aḫ-ḫu-un nu-uš-ma-aš-kán ERIN2.MEŠ iš-ḫi-iḫ-ḫu-un nu-mu ERIN2.MEŠ pé-eš-[ki]-u-an

32. da-a-ir nu-za KUR URUar-za-u-wa ku-it ḫu-u-ma-an tar-aḫ-ḫu-un nu-za dUTU-ŠI ku-in

33. NAM.RA I-NA É LUGAL ú-wa-te-nu-un na-aš an-da 1-et-ta 6-10000 6-LI-IM NAM.RA

34. e-eš-ta URUKUG.BABBAR-aš-ma-za EN.MEŠ ERIN2.MEŠ ANŠU.KUR.RA.MEŠ-ia ku-in NAM.RA GUD UDU-ia

35. ú-wa-te-et nu-uš-ša-an kap-pu-u-wa-u-wa-ar NU.GÁL e-eš-ta

36. nu-za ma-aḫ-ḫa-an KUR URUar-za-u-wa ḫu-u-ma-an tar-aḫ-ḫu-un

37. nam-ma URUKUG.BABBAR-ši ar-ḫa ú-wa-nu-un nu-kán I-NA KUR URUar-za-u-wa ku-it

38. an-da ge-em-ma-an-da-ri-ia-nu-un nu ki-i I-NA MU.2.KAM DÙ-nu-un

Single rule.

39. MU.1.KAM-an-ni-ma I-NA ḪUR.SAGaš-ḫar-pa-ia pa-a-un nu-za ḪUR.SAGaš-ḫar-pa-ia-an ku-iš

40. URUga-aš-ga-aš e-ša-an ḫar-ta nu ŠA KUR URUpa-la-a KASKAL.MEŠ kar-aš-ša-an ḫar-ta

41. nu u-ni ŠA ḪUR.SAGaš-ḫar-pa-ia URUga-aš-gan za-aḫ-ḫi-ia-nu-un nu-mu dUTU URUTÚL-na GAŠAN-IA

42. dU NIR.GÁL BE-LÍ-IA dme-ez-zu-ul-la-aš DINGIR.MEŠ-ia ḫu-u-ma-an-te-eš pí-ra-an

43. ḫu-u-i-e-er nu-za ḪUR.SAGaš-ḫar-pa-ia-an ku-iš URUga-aš-ga-aš e-ša-an ḫar-ta

44. na-an-za-an tar-aḫ-ḫu-un na-an-kán ku-e-nu-un ḪUR.SAGaš-ḫar-pa-ia-an-ma dan-na-at-ta-aḫ-ḫu-un

45. ⌈nam-ma⌉ ar-ḫa ú-wa-nu-un nu ma-aḫ-ḫa-an I-NA URUša-am-ma-ḫa a-ar-ḫu-un

46. ⌈nu I-NA URU⌉zi-ú-li-la an-da-an ú-wa-nu-un

Single rule.

47. nu ku-it-ma-an A-BU-IA I-NA KUR URUmi-it-tan-ni e-eš-ta nu PAP URUa-ra-u-wa-an-na-aš

48. ku-iš KUR URUki-iš-ši-ia-a GUL-an-né-eš-ki-it na-at me-ek-ki ta-ma-aš-ša-an

49. ⌈ḫar⌉-ta nu dUTU-ŠI I-NA KUR URUa-ra-u-wa-an-na pa-a-un nu KUR URUa-ra-u-wa-an-na

50. GUL-un nu-mu dUTU URUTÚL-na GAŠAN-IA dU NIR.GÁL BE-LÍ-IA dme-ez-zu-ul-la-aš

51. DINGIR.MEŠ-ia ḫu-u-ma-an-te-eš pí-ra-an ḫu-u-i-e-er nu-za KUR URUa-ra-u-wa-an-na ḫu-u-ma-an tar-aḫ-ḫu-un

52. nu-za IŠ-TU KUR URUa-ra-u-wa-an-na ku-in NAM.RA.MEŠ I-NA É LUGAL ú-wa-te-nu-un

53. na-aš 3-LI-IM 5-ME NAM.RA e-eš-ta URUKUG.BABBAR-aš-ma-za EN.MEŠ ERIN2.MEŠ ANŠU.KUR.RA.MEŠ-ia

54. ku-in NAM.RA.MEŠ GUD UDU ú-wa-te-et nu-kán kap-pu-u-wa-u-wa-ar NU.GÁL e-eš-ta

55. nu-za ma-aḫ-ḫa-an KUR URUa-ra-u-wa-an-na tar-aḫ-ḫu-un nam-ma EGIR-pa KUG.BABBAR-ši

56. ú-wa-nu-un nu I-NA MU.1.KAM ki-i i-ia-nu-un

Single rule.

57. MU-an-ni-ma I-NA KUR URUzi-ḫar-ri-ia pa-a-un nu-za A-NA PA-NI A-BI-IA

58. ku-iš URUga-aš-ga-aš ḪUR.SAGta-ri-ka-ri-mu-un ŠU.DIM4-az e-ša-at

59. nam-ma-aš-za URUKUG.BABBAR-ši ḫar-ga-aš ki-ša-at nu ú-e-er URUKUG.BABBAR-ša-an GUL-ḫi-ir

60. na-an me-ek-ki dam-me-eš-ḫa-a-ir nu dUTU-ŠI pa-a-un nu-za ḪUR.SAGta-ri-ka-ri-mu-un

61. ku-it URUga-aš-ga-aš e-ša-an ḫar-ta na-an GUL-un nu-mu dUTU URUTÚL-na

62. GAŠAN-IA dU NIR.GÁL BE-LÍ-IA dme-ez-zu-ul-la-aš DINGIR.MEŠ-ia ḫu-u-ma-an-te-eš

63. pí-ra-an ḫu-u-i-e-er nu-za ŠA ḪUR.SAGta-ri-ka-ri-mu URUga-aš-gan

64. tar-aḫ-ḫu-un na-an-kán ku-e-nu-un ḪUR.SAGta-ri-ka-ri-mu-un-ma

65. dan-na-at-ta-aḫ-ḫu-un KUR URUzi-ḫar-ri-ia-ia ḫu-u-ma-an ar-ḫa wa-ar-nu-nu-un

66. nam-ma EGIR-pa URUKUG.BABBAR-ši ú-wa-nu-un nu ki-i I-NA MU.1.KAM DÙ-nu-un

Single rule.

67. MU-nu-an-ni-ma I-NA KUR URUti-pí-ia pa-a-un nu ku-it-ma-an A-BU-IA

68. I-NA KUR mi-it-tan-ni e-eš-ta mpí-iḫ-ḫu-ni-ia-aš-ma LÚ URUti-pí-ia i-ia-at-ta-at

69. nu KUR UGU GUL-an-né-eš-ki-it na-aš pa-ra-a I-NA URUza-az-zi-ša

70. a-ar-aš-ki-it nu KUR UGU ša-ra-a da-a-aš na-at-kán I-NA KUR ga-aš-ga

71. kat-ta-an-ta pé-e-da-aš KUR URUiš-ti-ti-na-⌈ma⌉-za ḫu-u-ma-an da-a-aš

72. na-at-za a-pé-el ú-i-ši-ia-u-wa-aš pé-e-da-an i-ia-at

Single rule.

73. nam-ma mpí-iḫ-ḫu-ni-ia-aš Ú-UL ŠA URUga-aš-ga i-wa-ar ta-pa-ar-ta

74. ḫu-u-da-a-ak ma-aḫ-ḫa-an I-NA URUga-aš-ga Ú-UL ŠA 1-EN ta-pa-ri-ia-aš

75. e-eš-ta a-ši-ma mpí-iḫ-ḫu-ni-ia-aš ŠA LUGAL-UT-TIM i-wa-ar

76. ta-pa-ar-ta nu-uš-ši dUTU-ŠI pa-a-un nu-uš-ši ṬE4-MA u-i-ia-nu-un

77. nu-uš-ši ḫa-at-ra-a-nu-un ÌR.MEŠ-IA-wa-za ku-i-e-eš da-a-aš nu-wa-ra-aš-kán I-NA URUga-aš-ga

78. kat-ta-an-ta pé-e-ḫu-te-et nu-wa-ra-aš-mu ar-ḫa up-pí

79. mpí-iḫ-ḫu-ni-ia-aš-ma-mu EGIR-pa ki-iš-ša-an ḫa-at-ra-a-eš

80. Ú-UL-wa-at-ta ku-it-ki EGIR-pa pí-iḫ-ḫi ma-a-an-na-wa-mu za-aḫ-ḫi-ia

81. ú-wa-ši nu-wa-at-ta Ú-UL ku-wa-at-qa am-me-el A.ŠÀ ku-e-ri an-⌈da⌉

82. za-aḫ-ḫi-ia ti-ia-mi A-NA KUR-TI-KA-wa-at-ta me-na-aḫ-ḫa-an-da ú-wa-mi

83. nu-wa-at-tak-kán A-NA ŠÀ KUR-KA za-aḫ-ḫi-ia ti-ia-mi nu-mu ma-⌈aḫ⌉-ḫa-an

84. mpí-iḫ-ḫu-ni-ia-aš e-ni-iš-ša-an EGIR-pa IŠ-PUR nu-mu ÌR.MEŠ-IA

85. EGIR-pa Ú-UL pí-iš-ta nu-uš-ši za-aḫ-ḫi-ia pa-a-un nu-uš-ši KUR-

86. GUL-un nu-mu dUTU URUTÚL-na GAŠAN-IA dU NIR.GÁL BE-LÍ-IA dme-ez-zu-ul-la-aš

87. DINGIR.MEŠ-ia ḫu-u-ma-an-te-eš pí-ra-an ḫu-u-i-e-er nu-za KUR URUti-pí-ia

88. ḫu-u-ma-an tar-aḫ-ḫu-un na-at ar-ḫa wa-ar-nu-nu-un

89. mpí-iḫ-ḫu-ni-ia-an-na AṢ-BAT na-an URUKUG.BABBAR-ši ar-ḫa ú-wa-te-nu-un

90. nam-ma IŠ-TU KUR URUti-pí-ia EGIR-pa ú-wa-nu-un nu-za mpí-iḫ-ḫu-ni-ia-aš ku-it

91. KUR URUiš-ti-ti-na ta-a-an ḫar-ta na-at EGIR-pa ú-e-te-nu-un

92. na-at EGIR-pa ŠA KUR URUḫa-at-ti KUR-e i-ia-nu-un

Single rule.

93. nam-ma-za ma-aḫ-ḫa-an KUR URUti-pí-ia tar-aḫ-ḫu-un nu A-NA man-ni-ia LUGAL URUaz-zi

94. ṬE4-MA u-i-ia-nu-un nu-uš-ši ḫa-at-ra-a-nu-un ku-it-ma-an-wa A-BU-IA

95. I-NA KUR URUmi-it-ta-an-ni e-eš-ta nu-wa-tak-kán ÌR.MEŠ-IA ku-i-e-eš an-da ú-e-er