Obverse
Column 1
1. UMMA dUTU-ŠI Mursili LUGAL GAL LUGAL KUR Hatti UR.SAG
2. DUMU Suppiluliuma LUGAL GAL UR.SAG :
──────────────────
3. Kuitman=za=kan ANA GIŠGU.ZA ABI=YA nāwi eshat nu=mu arahzenas
4. KUR.KUR.MEŠ LÚKÚR hūmantes kururiyahhir. Nu=za ABU=YA kuwapi DINGIR-is iyat,
5. Arnuandas=ma=za=kan ŠEŠ=YA ANA GIŠGU.ZA ABI=ŠU esat. Appan=ma=as
6. irmaliyattat=pat. Mahhan KUR.KURMEŠ LÚKÚR Arnuandan ŠEŠ=YA irman
7. istamassir, nu KUR.KURMEŠ LÚKÚR kururiyahhiskiuan dāir.
──────────────────
8. Mahhan=ma=za Arnuandas ŠEŠ=YA DINGIR-is kisat, nu KUR.KURMEŠ LÚKÚR UL=ya kuēs kururiyahheskir
9. nu apūs=a KUR.KURMEŠ LÚKÚR kururiyahhir. Arahzenas KUR.KURMEŠ LÚKÚR kissan
10. memir : "ABU=ŠU=wa=si kuis LUGAL KUR Hatti esta, nu=war=as UR.SAG-is hassus esta.
11. Nu=wa=za KUR.KURMEŠ LÚKÚR tarhan harta. Nu=war=as=za DINGIR-is iyat. DUMU=ŠU=ma=wa=si=za=kan
12. kuis ANA GIŠGU.ZA ABI=ŠU esat, nu=wa apās=a karū LÚKAL-anza esta.
13. Nu=war=an irmaliyattat. Nu=wa=za apās=a DINGIR-is kisat.
──────────────────
14. Kinun=ma=wa=za=kan kuis ANA GIŠGU.ZA ABI=ŠU esat. Nu=war=as TUR-las.
15. Nu=wa KUR Hatti ZAG.HI.A KUR Hatti=ya=wa UL huisnuzi."
──────────────────
16. ABU=YA=ma=kan INA KUR URUMitanni kuit anda asanduleskit,
17. n(u)=as=kan asanduli anda istandāit ŠA dUTU URUArinna=ma=kan GAŠAN=YA
18. EZEN.ḪI.A sakuwandareskir.
──────────────────
19. Mahhan=ma=za=kan dUTU-ŠI ANA GIŠGU.ZA ABI=YA eshat, nu=mu arahzenas KUR.KUR LÚKÚR
20. kuēs kururiyahhir nu ANA KUR.KUR LÚKÚR nāwi kuitman kuēdanikki
21. pāun, nu ANA ŠA dUTU URUArinna=pat GAŠAN=YA SAG.ÚS-as ANA EZEN.ḪI.A appan tiyanun.
22. N(u)=as=za iyanun nu ANA dUTU URUArinna GAŠAN=YA kesseran sarā eppun.
23. Nu kissan AQBI : "dUTU URUArinna GAŠAN=YA, arahzenas=wa=mu=za KUR.KURMEŠ LÚKÚR kuēs
24. TUR-lan halzessir, nu=wa=mu=za tepnuskir. Nu=wa tuēl ŠA dUTU URUArinna
25. GAŠAN=YA EZEN.ḪI.A danna sanhiskiwan dāir. Nu=wa=mu dUTU URUArinna GAŠAN=YA
26. kattan tiya. Nu=wa=mu=kan uni arahzenas KUR.KURMEŠ LÚKÚR piran kuenni."
27. Nu=mu dUTU URUArinna memian istamasta. N(u)=as=mu kattan tiyat.
28. Nu=za=kan ANA GIŠGU.ZA ABI=YA kuwapi eshat, nu=za kē arahzenas
29. KUR.KURMEŠ LÚKÚR INA MU.10.KAM tarhun. N(u)=at=kan kuenun.
──────────────────
30. ŠA KUR URUTurmitta=mu URUGasgas kururiyahta nu=mu walhuwanzi. Mahhan
31. namma URUGasgas uit=pat, nu KUR URUTurmitta walhanniskiwan dāis.
32. Nussi dUTU-ŠI pāun. Nu ša URUGasga kuēs SAG.DU.MEŠ KUR.KUR.MEŠ URUHalilas
33. URUDuddusgas=a esir, n(u)=as walhun. N(u)=as IŠTU NAM.RA GUD.ḪI.A UDU.ḪI.A
34. sarā dahhun, n(u)=as URUHattusi arha udahhun.
35. URUHalilan=ma URUDuddusgan=na arha warnunun.
──────────────────
36. Mahhan=ma KUR URUGasga ŠA URUHalila U ŠA URUDuddusga harninkuwar
37. istamasta, KUR URUGasga hūman anda warressesta.
38. N(u)=at=mu zahhiya uit, n(u)=an dUTU-ŠI zahhiyanun. Nu=mu dUTU URUArinna
39. GAŠAN=YA Tarhus NIR.GÁL EN=YA Mezzullas DINGIR.MEŠ hūmantes piran huēr.
40. Nu=za ŠA KUR URUGasga ERIN2.MEŠ NA'RĀRUM tarhun, n(u)=an=kan kuenun.
41. Nu=za ŠA KUR URUTurmitta URUGasgas dān appa ÌR-ahtat,
42. nu=mu ERIN2.MEŠ peskiwan dāir.
──────────────────
43. Namma dUTU-ŠI appa uwanun : nu=mu ŠA KUR URUIshupitta kuit URUGasgas
44. kururiyahhan harta, nu=mu ERIN2.MEŠ UL peskit. Nu dUTU-ŠI INA KUR URUIshupitta
45. pāun. Nu=za=kan URUArmessenan walhun. N(u)=an IŠTU NAM.RA GUD UDU
46. sarā dahhun, n(u)=an URUHattusi arha udahhun. URU-an=ma arha
47. warnunun. Nu=za ŠA KUR URUIshupitta URUGasga dān appa ÌR-ahhun.
48. Nu=mu ERIN2.MEŠ peskiwan dāir. Nu kī [...] INA MU.1.KAM iyanun.
──────────────────
49. Wetantanni=ma INA KUR URUUGU-TI pāun : nu=mu KUR URUTipiya kuit kururiyahhan harta,
50. nu=mu ERIN2.MEŠ UL peskit. Nu dUTU-ŠI URUKathaidduwan walhun.
51. N(u)=an IŠTU NAM.RA GUD UDU URUHattusi arha udahhun.
52. URU-an=ma arha warnunun.
──────────────────
53. Mahhan=ma=za=kan namma URUHattusi appa uwanun. Nu KUR URUIshupitta kuit
54. [...] dān appa tarhta. Nu=kan ABI=YA
55. [...] isparter
56. [...] n(u)=as=kan INA KUR URUGasga
57. [...]-asta
58. [...] SAG.DU.MEŠ BAL
59. [...] dUTU-ŠI URUKammaman
60. [... URU...-an-na] walhun