2.BoTU.48 = VAT.6165 = KBo.III.4

Obverse

Column 1

1. [UM-MA dUTU]-ŠI mmur-ši-li LUGAL GAL LUGAL KUR ḫa-at-ti UR.SAG

2. [DUMU mšu-up]-pí-lu-li-u-ma LUGAL GAL UR.SAG

Single rule.

3. ku-it-ma-an-za-kán A-NA GIŠGU.ZA A-BI-IA na-wi5 e-eš-ḫa-at nu-mu a-ra-aḫ-zé-na-aš

4. KUR.KUR.MEŠ KÚR ḫu-u-ma-an-te-eš ku-u-ru-ri-ia-aḫ-ḫi-ir nu-za A-BU-IA ku-wa-pí DINGIR⌈-LIM⌉-iš DÙ-at

5. mar-nu-an-da-aš-ma-za-kán ŠEŠ-IA A-NA GIŠGU.ZA A-BI-ŠU e-ša-at EGIR-an-ma-aš

6. ir-ma-li-ia-at-ta-at-pat ma-aḫ-ḫa-an KUR.KUR.MEŠ KÚR mar-nu-an-da-an ŠEŠ-IA ir-ma-an

7. iš-ta-ma-aš-šir nu KUR.KUR.MEŠ KÚR ku-u-ru-ri-ia-aḫ-ḫi-iš-ki-u-an da-a-ir

Single rule.

8. ma-aḫ-ḫa-an-ma-za mar-nu-an-da-aš ŠEŠ-IA DINGIR-LIM-iš ki-ša-at nu KUR.KUR.MEŠ KÚR Ú-UL-ia ku-i-e-eš ku-u-ru-ri-ia-aḫ-ḫe-eš-kir

9. nu a-pu-uš-ša KUR.KUR.MEŠ KÚR ku-u-ru-ri-ia-aḫ-ḫi-ir a-ra-<aḫ>-zé-na-aš KUR.KUR.MEŠ KÚR ki-iš-ša-an

10. me-mi-ir A-BU-ŠU-wa-aš-ši ku-iš LUGAL KUR ḫat-ti e-eš-ta nu-wa-ra-aš UR.SAG-iš LUGAL-uš e-eš-ta

11. nu-wa-za KUR.KUR.MEŠ KÚR tar-aḫ-ḫa-an ḫar-ta nu-wa-ra-aš-za DINGIR-LIM-iš DÙ-at DUMU-ŠU-ma-wa-aš-ši-za-kán

12. ku-iš A-NA GIŠGU.ZA A-BI-ŠU e-ša-at nu-wa a-pa-a-aš-ša ka-ru-ú KAL-an-za e-eš-ta

13. nu-wa-ra-an ir-ma-li-at-ta-at nu-wa-za a-pa-a-aš-ša DINGIR-LIM-iš ki-ša-at

Single rule.

14. ki-nu-un-ma-wa-za-kán ku-iš A-NA GIŠGU.ZA A-BI-ŠU e-ša-at nu-wa-ra-aš TUR-la-aš

15. nu-wa KUR ḫat-ti ZAG.ḪI.A KUR ḫat-ti-ia-wa Ú-UL TI-nu-zi

Single rule.

16. A-BU-IA-ma-kán I-NA KUR URUmi-it-ta-an-ni ku-it an-da a-ša-an-du-le-eš-ki-it

17. na-aš-kán a-ša-an-du-li an-da iš-ta-an-da-a-it ŠA dUTU URUa-ri-in-na-ma-kán GAŠAN-IA

18. EZEN.ḪI.A ša-ku-wa-an-da-re-eš-ki-ir

Single rule.

19. ma-aḫ-ḫa-an-ma-za-kán dUTU-ŠI A-NA GIŠGU.ZA A-BI-IA e-eš-ḫa-at nu-mu a-ra-aḫ-zé-na-aš KUR.KUR KÚR

20. ku-i-e-eš ku-u-ru-ri-ia-aḫ-ḫi-ir nu A-NA KUR KÚR na-wi5 ku-it-ma-an ku-e-da-ni-ik-ki

21. pa-a-un nu A-NA ŠA dUTU URUa-ri-in-na-pat GAŠAN-IA SAG.ÚS-aš A-NA EZEN.ḪI.A EGIR-an ti-ia-nu-un

22. na-aš-za i-ia-nu-un nu A-NA dUTU URUa-ri-in-na GAŠAN-IA ŠU-an ša-ra-a e-ep-pu-un

23. nu ki-iš-ša-an AQ-BI dUTU URUa-ri-in-na GAŠAN-IA a-ra-aḫ-zé-na-aš-wa-mu-za KUR.KUR KÚR ku-i-e-eš

24. TUR-la-an ḫal!(aš)-ze-eš-šir nu-wa-mu-za te-ep-nu-uš-kir nu-wa tu-el ŠA dUTU URUa-ri-in-na

25. GAŠAN-IA ZAG.ḪI.A da-an-na ša-an-ḫi-iš-ki-u-an da-i-ir nu-wa-mu dUTU URUa-ri-in-na GAŠAN-IA

26. kat-ta-an ti-ia nu-wa-mu-kán u-ni a-ra-aḫ-zé-na-aš KUR.KUR KÚR pí-ra-an ku-en-ni

27. nu-mu dUTU URUa-ri-in-na me-mi-an iš-ta-ma-aš-ta na-aš-mu kat-ta-an ti-ia-at

28. nu-za-kán A-NA GIŠGU.ZA A-BI-IA ku-wa-pí e-eš-ḫa-at nu-za ke-e a-ra-aḫ-zé-na-aš

29. KUR.KUR.MEŠ KÚR I-NA MU.10.KAM tar-aḫ-ḫu-un na-at-kán ku-e-nu-un

Single rule.

30. ŠA KUR URUtúr-mi-it-ta-mu URUga-aš-ga-aš ku-u-ru-ri-ia-aḫ-ta ⌈nu-mu GUL-ḫu-wa-an⌉-[zi] ⌈GIM-an⌉

31. nam-ma URUqa-aš-qa-aš ú-it-pat nu KUR URUtúr-mi-it-ta GUL-an-ni-iš-ki-u-an da?-[a-iš]

32. nu-uš-ši dUTU-ŠI pa-a-un nu ŠA URUga-aš-ga ku-i-e-eš SAG.DU.MEŠ KUR.KUR.MEŠ URUḫa-li-la-aš

33. URUdu-ud-du-uš-ga-aš-ša e-šir na-aš GUL-un na-aš IŠ-TU NAM.RA GUD.ḪI.A UDU.ḪI.A

34. ⌈ša⌉-ra-a da-aḫ-ḫu-un na-aš URUKUG!!.BABBAR-ši ar-ḫa ú-da-aḫ-ḫu-un

35. [URUḫa]-li-la-an-ma URUdu-ud-du-uš-ga-an-na ar-ḫa wa-ar-nu-nu-un

Single rule.

36. [ma-aḫ]-ḫa-an-ma KUR URUga-aš-ga ŠA URUḫa-li-la Ù ŠAURUdu⌉-ud-du-uš-ga ḫar-ni-in-ku-u-ar

37. [iš-ta]-ma-aš-ta KUR URUga-aš-ga ḫu-u-⌈ma-an⌉ an-da wa-ar-re-eš-še-eš-ta

38. [na-at-m]u MÈ-ia <<aš>> ú-it na-an dUTU-ŠI MÈ-ia-nu-un nu-mu dUTU URUa-ri-in-na

39. [GAŠAN-IA] dU NIR.GÁL EN-IA dme-ez-zu-ul-la-aš DINGIR.MEŠ ḫu-u-ma-an-te-eš pí-ra-an ḫu-i-e-er

40. [nu-za ŠA KUR] URUkaš-ga ERIN2.MEŠ NA-RA-RUM tar-aḫ-ḫu-un na-an-kán ku-e-nu-un

41. [nu-za ŠA KUR URU]túr-mi-it-ta URUga-aš-ga-aš da-a-an EGIR-pa ÌR-aḫ-ta-at

42. [nu-mu ERIN2.MEŠ] pé-eš-ki-u-an da-a-ir

Single rule.

43. [nam-ma dUTU-ŠI EGIR]-pa ú-wa-nu-un nu-mu ŠA KUR URUiš-ḫu-pí-it-ta ku-it URUga-aš-ga-aš

44. [ku-u-ru-ri-ia-aḫ-ḫa-an ḫar]-ta nu-mu ERIN2.MEŠ Ú-UL pé-eš-ki-it nu dUTU-ŠI I-NA KUR URUiš-ḫu-pí-it-ta

45. [pa-a-un nu-za-kán URUar?]-mi-eš-še-na-an GUL-un na-an IŠ-TU NAM.RA GUD UDU

46. [ša-ra-a da-aḫ-ḫu-un] na-an URUKUG.BABBAR-ši ar-ḫa ú-da-aḫ-ḫu-un URU-an-ma ar-ḫa

47. [wa-ar-nu-nu-un nu-za ŠA] KUR URUiš-ḫu-pí-it-ta URUga-aš-ga da-a-an EGIR-pa ÌR-aḫ-ḫu-un

48. [nu-mu ERIN2.MEŠ pé-eš ki-u-an da-a]-ir nu ki-i [...] I-NA MU.1.KAM i-ia-nu-un

Single rule.

49. [MU-an-ni-ma I-NA KUR URUUGU-TI] pa-a-un nu-mu KUR URUti-pí-ia ku-it ku-u-ru-ri-ia-aḫ-ḫa-<an> ḫar-ta

50. [nu-mu ERIN2.MEŠ Ú-UL pé-eš-ki-it] nu dUTU-ŠI URUkat-ḫa-id-du-wa-an GUL-un

51. [na-an IŠ-TU NAM.RA GUD UDU URU]KUG.BABBAR-ši ar-ḫa ú-da-aḫ-ḫu-un

52. [URU-an-ma ar-ḫa wa-ar-nu-nu]-un

Single rule.

53. [ma-aḫ-ḫa-an-ma-za-kán nam-ma URU]KUG.BABBAR-ši EGIR-pa ú-wa-nu-un nu KUR URUiš-ḫu-pí-it-ta ku-it

54. [...] da-a-an EGIR-pa tar-aḫ-ta nu-kán A-BI-IA

55. [...] iš-bar-te-er

56. [...] na-aš-kán I-NA KUR URUga-aš-ga

57. [...]-aš-ta

58. [...] SAG.DU.MEŠ BAL

59. [...] dUTU-ŠI URUkam-ma-ma-an

60. [... URU...-an-na] GUL-⌈un⌉