1. UM-MA mki-il-l[a LÚSANGA dU] URUne-ri-ik
2. ne-pí-ša-aš dIM-[aš EZ]EN
3. pu-ru-ul-li-ya-aš ut-tar nu ma-a-an
4. ki-iš-ša-an ta-ra-an-zi
Single rule.
5. ud-né-wa ma-a-ú še-eš-du nu-wa ud-né-e
6. pa-aḫ-ša-nu-wa-an e-eš-du nu ma-a-an
7. ma-a-i še-eš-zi nu EZEN pu-ru-ul-li-ya-aš
8. i-ya-an-zi
Single rule.
9. ma-a-an dIM-aš MUŠil-lu-ya-an-ka-aš-ša
10. I-NA URUki-iš-ki-lu-uš-ša ar-ga ti-[i]-e-er
11. nu-za MUŠil-lu-ya-an-ka-aš dIM-an [tar-a]ḫ-ta?
Single rule.
12. dIM-aš-ta-aš-ša DINGIRMEŠ-na-aš ḫu-u-ma-a[n-du]-uš
13. mu-ú-ga-it [...]
14. nu-za di-na-ra-aš EZEN-an i-e-et
Single rule.
15. nu ḫu-u-ma-an me-ek-ki ḫa-an-da-it
16. ĜEŠTIN-aš DUGpal-ḫi mar-nu-wa-an-da-aš DUGpal-ḫi
17. [wa-a]l-ḫi-ya-aš DUGpal-ḫi [nu] DUG⌈pal-ḫa⌉-aš
18. ⌈an-da⌉-an i-ya-a-da i-[e-et]
Double rule.
19. nu d[i-na-ra-aš I-NA URUz]i?-ig-ga-ra-at-ta pa-it
20. nu mḫu-u-pa-ši-ya-an LÚ.ULU3.LU ú-e-mi-it
Single rule.
21. UM-MA mi-na-ar mḫu-u-pa-ši-ya ka-a-ša-wa
22. ki-i-ya ki-i-ya ut-tar i-ya-mi
23. nu-wa-mu-uš-ša-an zi-iq-qa ḫar-ap-ḫu-ut
Single rule.
24. UM-MA mḫu-u-pa-ši-ya A-NA mi-na-ar
25. ma-a-wa kat-ti-ti še-eš-m[i nu-w]a ú-wa-mi
26. kar-di-aš-ta-aš i-ya-mi [na-aš kat-t]i-ši še-eš-ta
Single rule.
27. nu di-na-ra-aš mḫu-u-pa-[ši-ya-an É-ri p]é-e-ḫu-te-et
28. na-an mu-un-na-a-it d[i]-na-ra-aš-ša-az
29. ú-nu-ut-ta-at na-aš-ta MUŠil-lu-ya-an-k[a-an]
1'. ḫa-at-te-eš-na-az ša-ra-a kal-li-iš-ta
2'. ka-a-ša-wa-za EZEN-an i-ya-mi
3'. nu-wa a-da-an-na a-ku-wa-an-na e-ḫu
Single rule.
4'. na-aš-ta MUŠil-lu-i-ya-an-ka-aš QA-DU [DUMUMEŠ-ŠU]
5'. ša-ra-a ú-e-er nu-za e-te-er e-ku-ir
6'. na-aš-ta DUGpal-ḫa ḫu-u-ma-an-da e-[ku-ir]
7'. ne-za ni-in-ke-e-er
Single rule.
8'. ne nam-ma ḫa-at-te-eš-na-aš kat-ta-an-⌈ta⌉
9'. nu-u-ma-an pa-a-an-zi mḫu-u-pa-ši-ya-aš-ša
10'. ú-it nu MUŠil-lu-i-ya-an-ka-an
11'. iš-ḫi-ma-an-ta ka-le-e-li-e-et
Single rule.
12'. dIM-aš ú-it nu-kán MUŠil-lu-i-y[a-an-ka-an]
13'. ku-en-ta DINGIRMEŠ-ša kat-ti-iš-ši e-eš-er
Single rule.
14'. nu-za-an di-na-ra-aš NA4pé-ru-ni [še-er]
15'. É-ir ú-e-te-et [...]
16'. nu mḫu-u-pa-ši-ya-an an-da-an É-[ri]
17'. a-ša-aš-ta na-an di-na-ra-aš
18'. wa-tar-na-aḫ-ḫi-iš-ki-iz-zi ma-a-wa gi-im-ra
19'. pa-i-mi zi-ig-ga-wa-ra-aš-ta ĜIŠlu-ut-ta-an-za
20'. ar-ḫa le-e a-ut-ti
21'. ma-a-wa-ra-aš-ta ar-ḫa-ma a-ut-ti
22'. nu-wa-za DAM-KA DUMUMEŠ-KA a-ut-ti
Single rule.
23'. ma-a-an UD.20.KAM pa-it a-pa-a-ša ĜIŠlu-ut-[ta-an]
24'. ar-ḫa šu-wa-i-it nu DAM-SÚ DUMUMEŠ-[ŠU a-uš-ta]
Single rule.
25'. [ma]-a-an di-na-ra-aš-ša gi-im-ra-az EĜIR-pa
26'. ú-it a-pa-aš-ša ú-e-eš-ga-u-an da-a-iš
27'. [a]-ap-pa-wa-mu É-na tar-na
n lines broken.
4". nu-za DUMU.MUNUS ŠA LÚa-ši-wa-an-da-aš
5". A-NA DAM-ŠU da-a-aš nu-za IBILA ḫa-aš-ta
6". ma-a-na-aš šal-le-eš-ta-ma
7". nu-za DUMU.MUNUS MUŠil-lu-ya-an-ka-aš
8". DAM-an-ni da-a-aš
Single rule.
9". dIM DUMU-an wa-tar-na-aḫ-ḫe-eš-ki-iz-zi
10". ma-a-an-wa A-NA É DAM-KA pa-a-i-ši
11". nu-wa-aš-ma-aš-ta UZUŠÀ ša-ku-wa-ya
12". ú-e-ek
Single rule.
13". ma-a-na-aš pa-a-i-ta nu-uš-ma-aš UZUŠÀ
14". ú-e-ek-ta na-aš-ši pí-i-e-er
15". ap-pé-ez-zi-ya-an-na-aš-ma-aš ša-a-ku-wa-[ya]
16". ú-e-ek-ta nu-uš-ši a-pé-e-ya pí-i-e-er
17". na-at dIM-ni at-ti-iš-ši pé-e-da-aš
18". nu-za-an dIM-aš UZUŠÀ ša-ku-wa-aš-še-ta
19". EĜIR-pa da-a-aš
Single rule.
20". ma-a-an e-eš-re-eš-ši a-ap-pa
21". ka-ru-ú-i-li-at-ta SIG5-at-ta
22". na-aš nam-ma a-ru-ni za-aḫ-ḫi-ya pa-it
23". ma-a-an-ši za-aḫ-ḫa-in pa-a-iš
24". na-an-za nam-ma MUŠil-lu-ya-an-ka-⌈an⌉
25". tar-aḫ-ḫu-u-wa-an da-a-iš Ù DUMU dIM
26". MUŠil-lu-ya-an-ka-aš kat-ta
27". nu ša-ra-a ne-pí-ši at-ti-iš-ši
28". ḫal-za-a-iš
Single rule.
29". am-mu-ug-ga ⌈EĜIR⌉-pa an-da e-ep
30". le-e-mu ge-en-zu-wa-i-ši
31". nu-kán dIM-aš MUŠil-li-ya-a[n-ka-an]
32". Ù DUMU-ŠU ku-en-ta
33". nu ka-a-aš a-pa-[a]-aš dIM-aš [MUŠil-lu-ya-an-ka-aš-ša me-mi-aš?]